ਮੋਹਾਲੀ: ਮੁਹਾਲੀ ਦੀ ਡੇਰਾਬਸੀ ਸਬ-ਡਵੀਜ਼ਨ ਵਿੱਚ ਆਮ ਆਦਮੀ ਖੁੱਡਾਂ ਦਾ ਉਦਘਾਟਨ ਕੀਤਾ ਗਿਆ ਹੈ। ਲੋਕਾਂ ਨੂੰ ਸਸਤੀ ਰੇਤ ਮੁਹੱਈਆ ਕਰਵਾਉਣ ਲਈ ਇੱਕ ਵੱਡਾ ਕਦਮ ਚੁੱਕਦਿਆਂ ਸੂਬਾ ਸਰਕਾਰ ਨੇ ਪੰਜਾਬ ਦੇ ਛੇ ਜ਼ਿਲ੍ਹਿਆਂ ਵਿੱਚ ਜਨਤਕ ਮਾਈਨਿੰਗ ਲਈ ਸਾਈਟਾਂ ਖੋਲ੍ਹਣ ਦੀ ਨਵੀਂ ਪਹਿਲ ਕੀਤੀ ਹੈ।
ਮੁਹਾਲੀ ਵਿੱਚ ਸਥਿਤ ਟਾਂਗਰੀ ਰਿਵਰ ਮਾਈਨਿੰਗ ਸਾਈਟ ਦਾ ਉਦਘਾਟਨ ਡੇਰਾਬਸੀ ਦੇ ਵਿਧਾਇਕ ਕੁਲਜੀਤ ਸਿੰਘ ਰੰਧਾਵਾ ਨੇ ਏਡੀਸੀ (ਜੀ) ਮੁਹਾਲੀ ਅਮਨਿੰਦਰ ਕੌਰ ਬਰਾੜ ਅਤੇ ਡੇਰਾਬਸੀ ਦੇ ਐਸਡੀਐਮ ਹਿਮਾਂਸ਼ੂ ਗੁਪਤਾ ਦੀ ਹਾਜ਼ਰੀ ਵਿੱਚ ਕੀਤਾ।
ਅੱਜ ਆਮ ਜਨਤਾ ਲਈ ਖੋਲ੍ਹੇ ਗਏ ਆਮ ਆਦਮੀ ਖੱਡ ਵਿੱਚੋਂ ਰੇਤ 5.50 ਰੁਪਏ ਪ੍ਰਤੀ ਘਣ ਫੁੱਟ ਦੇ ਹਿਸਾਬ ਨਾਲ ਲੋਕਾਂ ਨੂੰ ਉਪਲਬਧ ਕਰਵਾਈ ਗਈ ਹੈ। ਇਹ ਸਾਈਟਾਂ ਜ਼ਿਲ੍ਹੇ ਵਿੱਚ ਰੇਤ ਅਤੇ ਬਜਰੀ ਨੂੰ ਨਿਯਮਤ ਅਤੇ ਵਾਜਬ ਦਰਾਂ ‘ਤੇ ਮੁਹੱਈਆ ਕਰਵਾਉਣ ਦੇ ਉਦੇਸ਼ ਨਾਲ ਖੋਲ੍ਹੀਆਂ ਗਈਆਂ ਹਨ ਤਾਂ ਜੋ ਜ਼ਿਲ੍ਹੇ ਵਿੱਚ ਮਾਮੂਲੀ ਖਣਿਜਾਂ ਦੀ ਜਮ੍ਹਾਖੋਰੀ ਅਤੇ ਕਾਲਾਬਾਜ਼ਾਰੀ ਨੂੰ ਰੋਕਿਆ ਜਾ ਸਕੇ।
ਮੋਹਾਲੀ ਦੇ ਜ਼ਿਲ੍ਹਾ ਮਾਈਨਿੰਗ ਅਫ਼ਸਰ ਡਾ: ਰਜਿੰਦਰ ਘਈ ਨੇ ਦੱਸਿਆ ਕਿ ਲੋਕ ਇਨ੍ਹਾਂ ਥਾਵਾਂ ਤੋਂ ਹੱਥੀਂ ਖੁਦਾਈ ਕਰਕੇ ਅਤੇ ਦਿਨ ਵੇਲੇ ਆਪਣੀ ਲੇਬਰ ਅਤੇ ਵਾਹਨ ਲੈ ਕੇ ਰੇਤਾ ਪ੍ਰਾਪਤ ਕਰ ਸਕਦੇ ਹਨ। ਇਨ੍ਹਾਂ ਥਾਵਾਂ ‘ਤੇ ਰੇਤ ਦੀ ਖੁਦਾਈ ਲਈ ਭਾਰੀ ਮਸ਼ੀਨਰੀ ਦੀ ਵਰਤੋਂ ‘ਤੇ ਪਾਬੰਦੀ ਹੋਵੇਗੀ। ਇਹ ਯਕੀਨੀ ਬਣਾਉਣ ਲਈ ਕਿ ਕੋਈ ਵੀ ਗੈਰ-ਕਾਨੂੰਨੀ ਮਾਈਨਿੰਗ ਨਾ ਹੋਵੇ, ਸਥਾਨ ਨੂੰ ਜਾਣ ਵਾਲੀਆਂ ਸੜਕਾਂ ‘ਤੇ ਸਥਾਨਕ ਪੁਲਿਸ ਵੱਲੋਂ ਸਖ਼ਤ ਨਾਕੇ ਲਗਾਏ ਜਾਣਗੇ।
ਉਦਘਾਟਨ ਮੌਕੇ ਡੇਰਾਬਸੀ ਦੇ ਐਸ.ਡੀ.ਓ ਲਖਵੀਰ ਸਿੰਘ, ਜੇ.ਈ ਨਰੋਤਮ ਸ਼ਰਮਾ, ਮਾਈਨਿੰਗ ਇੰਸਪੈਕਟਰ ਜਸਤਿੰਦਰ ਸਿੰਘ, ਰਾਜਾਪੁਰ, ਨਗਲਾ ਅਤੇ ਹੋਰ ਨੇੜਲੇ ਪਿੰਡਾਂ ਦੇ ਸਰਪੰਚ ਅਤੇ ਸਥਾਨਕ ਲੋਕ ਹਾਜ਼ਰ ਸਨ।
