ਪੰਜਾਬੀ ਗਾਇਕ ਰਾਜਵੀਰ ਜਵੰਦਾ ਦਾ ਬੁੱਧਵਾਰ (8 ਅਕਤੂਬਰ) ਨੂੰ ਸਵੇਰੇ ਮੁਹਾਲੀ ਦੇ ਫੋਰਟਿਸ ਹਸਪਤਾਲ ਵਿੱਚ ਦਿਹਾਂਤ ਹੋ ਗਿਆ ਹੈ। ਉਨ੍ਹਾਂ ਨੇ 35 ਸਾਲ ਦੀ ਉਮਰ ਵਿੱਚ ਆਖਰੀ ਸਾਹ ਲਿਆ। ਰਾਜਵੀਰ ਜਵੰਦਾ ਦਾ ਜਨਮ ਲੁਧਿਆਣਾ ਦੇ ਪੌਣਾ ਪਿੰਡ ਵਿੱਚ ਹੋਇਆ ਸੀ। ਰਾਜਵੀਰ ਜਵੰਦਾ ਨੂੰ ਛੋਟੀ ਉਮਰ ਤੋਂ ਹੀ ਗਾਉਣ ਦਾ ਸੌਂਕ ਸੀ। ਭਾਵੇਂ ਕਿ ਜਵੰਦਾ, ਪੰਜਾਬ ਪੁਲਿਸ ‘ਚ ਮੁਲਾਜ਼ਮ ਸੀ, ਪਰੰਤੂ ਇਸਦੇ ਬਾਵਜੂਦ ਉਸ ਨੇ ਇੱਕ ਪੁਲਿਸ ਵਾਲੇ ਤੋਂ ਪੰਜਾਬੀ ਗਾਇਕੀ ‘ਚ ਵੱਡਾ ਨਾਮਣਾ ਖੱਟਿਆ। ਆਓ ਜਾਣਦੇ ਹਾਂ ਕੁੱਝ ਉਸ ਦੇ ਸੰਗੀਤ ਸਫ਼ਰ ਬਾਰੇ.
ਜਵੰਦਾ ਪਹਿਲਾ ਪੰਜਾਬ ਪੁਲਿਸ ’ਚ ਸਨ
ਦੂਜੇ ਪਾਸੇ ਰਾਜਵੀਰ ਜਵੰਦਾ ਦਾ ਸਫ਼ਰ ਕਿਸੇ ਪ੍ਰੇਰਨਾਦਾਇਕ ਤੋਂ ਘੱਟ ਨਹੀਂ ਰਿਹਾ। ਗਾਇਕ ਨੇ ਦੱਸਿਆ ਕਿ ਉਸਦਾ ਪਰਿਵਾਰ ਪੰਜਾਬ ਪੁਲਿਸ ’ਚ ਸੇਵਾ ਨਿਭਾ ਰਿਹਾ ਹੈ ਜਿਸ ਦੇ ਚੱਲਦੇ ਉਸ ਨੇ ਵੀ ਪੰਜਾਬ ਪੁਲਿਸ ਜੁਆਇਨ ਕੀਤੀ। ਪਰ ਗਾਉਣ ਨੂੰ ਲੈ ਕੇ ਉਸਦਾ ਜਨੂੰਨ ਕਦੇ ਵੀ ਘੱਟ ਨਹੀਂ ਹੋਇਆ। ਪੀਟੀਸੀ ਪੰਜਾਬੀ ਨਾਲ ਇੱਕ ਪਿਛਲੀ ਇੰਟਰਵਿਊ ਵਿੱਚ ਜਵੰਦਾ ਨੇ ਦੱਸਿਆ ਕਿ ਜ਼ਿੰਦਗੀ ’ਚ ਅਨੁਸ਼ਾਨ ਨਾਲ ਕਿਵੇਂ ਰਹਿਣਾ ਅਤੇ ਕਿਵੇਂ ਆਪਣੇ ਇੱਕ ਵੱਡੇ ਛੋਟੇ ਕੰਮ ਕਰਨਾ ਉਸ ਨੂੰ ਪੁਲਿਸ ਦੀ ਸਿਖਲਾਈ ਦੌਰਾਨ ਪਤਾ ਲੱਗਿਆ ਅਤੇ ਉਸ ਨੇ ਕੀਤਾ ਵੀ ਜਿਸ ਦੇ ਚੱਲਦੇ ਉਹ ਆਪਣੇ ਬਹੁਤੇ ਕੰਮ ਆਪ ਹੀ ਕਰਦਾ ਸੀ।
ਜਵੰਦਾ ਇਨ੍ਹਾਂ ਗਾਇਕਾਂ ਤੋਂ ਲੈਂਦਾ ਸੀ ਪ੍ਰੇਰਨਾ
ਰਾਜਵੀਰ ਅਕਸਰ ਕੁਲਦੀਪ ਮਾਣਕ ਅਤੇ ਸੁਰਜੀਤ ਸਿੰਘ ਬਿੰਦਰਾਖੀਆ ਵਰਗੇ ਗਾਇਕਾਂ ਲਈ ਆਪਣੀ ਪ੍ਰਸ਼ੰਸਾ ਪ੍ਰਗਟ ਕਰਦਾ ਸੀ ਅਤੇ ਉਨ੍ਹਾਂ ਦੇ ਸਦੀਵੀ ਲੋਕ ਗੀਤਾਂ ਤੋਂ ਪ੍ਰੇਰਨਾ ਲੈਂਦਾ ਸੀ। ਯੂਨੀਵਰਸਿਟੀ ਵਿੱਚ, ਉਸਨੇ ਕੰਵਰ ਗਰੇਵਾਲ ਅਤੇ ਕੁਲਵਿੰਦਰ ਬਿੱਲਾ ਵਰਗੇ ਗਾਇਕਾਂ ਦੇ ਪ੍ਰਭਾਵ ਹੇਠ ਆਪਣੇ ਹੁਨਰ ਨੂੰ ਨਿਖਾਰਿਆ, ਜਦਕਿ ਢੋਲ, ਅਲਗੋਜੇ ਅਤੇ ਟੁੰਬੀ ਵਰਗੇ ਕਈ ਲੋਕ ਸਾਜ਼ਾਂ ਵਿੱਚ ਵੀ ਮੁਹਾਰਤ ਹਾਸਲ ਕੀਤੀ – ਜਿਨ੍ਹਾਂ ਵਿੱਚੋਂ ਇੱਕ ਉਨ੍ਹਾਂ ਨੇ ਖੁਦ ਵੀ ਬਣਾਇਆ ਸੀ।
ਗਾਇਕ ਨੂੰ ਕਿਹੜੇ-ਕਿਹੜੇ ਸ਼ੌਕ ਸਨ ?
ਪੰਜਾਬੀ ਗਾਇਕ ਮੋਟਰਸਾਈਕਲਾਂ ਅਤੇ ਮੋਟਰਸਾਈਕਲ ‘ਤੇ ਘੁੰਮਣ ਦਾ ਸ਼ੌਕੀਨ ਸੀ । ਜਵੰਦਾ ਨੇ ਪਹਿਲਾਂ ਵੀ ਆਪਣੇ ਸੋਧੇ ਹੋਏ ਰਾਇਲ ਐਨਫੀਲਡ ‘ਤੇ ਲੇਹ-ਲੱਦਾਖ ਦੀ ਯਾਤਰਾ ਵੀ ਕੀਤੀ ਸੀ। ਉਸ ਨੇ ਮੁਸ਼ਕਿਲ ਹਾਲਾਤਾਂ ਦੇ ਬਾਵਜੂਦ ਇਸ ਖੇਤਰ ਦੀ ਯਾਤਰਾ ਕਰਨ ਵਾਲੇ ਪਹਿਲੇ ਸਵਾਰਾਂ ਵਿੱਚੋਂ ਇੱਕ ਹੋਣ ਦਾ ਦਾਅਵਾ ਕੀਤਾ ਸੀ। ਉਸਦੇ ਨਜ਼ਦੀਕੀ ਦੋਸਤ ਉਸਨੂੰ ਇੱਕ ਸੁਤੰਤਰ ਵਿਅਕਤੀ ਵਜੋਂ ਯਾਦ ਕਰਦੇ ਹਨ, ਜੋ ਉਨ੍ਹਾਂ ਨਾਲ ਸਮਾਂ ਬਿਤਾਉਣਾ ਜਾਂ ਜਦੋਂ ਵੀ ਉਸਦੀ ਇੱਛਾ ਹੁੰਦੀ ਸੀ ਤਾਂ ਉਹ ਗੱਡੀ ਚਲਾਉਣਾ ਪਸੰਦ ਕਰਦਾ ਸੀ।
ਦੂਜੇ ਗਾਇਕਾਂ ਨਾਲ ਕਦੇ ਨਹੀਂ ਕੀਤਾ ਮੁਕਾਬਲਾ
ਇੱਕ ਗਾਇਕ ਤੋਂ ਵੱਧ ਰਾਜਵੀਰ ਜਵੰਦਾ ਇੱਕ ਬਹੁ-ਪ੍ਰਤਿਭਾਸ਼ਾਲੀ ਵੀ ਹਨ, ਜਿਨ੍ਹਾਂ ਨੇ ਸੰਗੀਤ ਨੂੰ ਕਦੇ ਵੀ ਦੂਜਿਆਂ ਨਾਲ ਮੁਕਾਬਲੇ ਵਜੋਂ ਨਹੀਂ ਦੇਖਿਆ, ਸਗੋਂ ਸਵੈ-ਵਿਕਾਸ ਦੀ ਯਾਤਰਾ ਵਜੋਂ ਦੇਖਿਆ। ਉਨ੍ਹਾਂ ਨੇ ਇੱਕ ਵਾਰ ਕਿਹਾ ਸੀ ਕਿ ਮੇਰਾ ਇੱਕੋ ਇੱਕ ਮੁਕਾਬਲਾ ਆਪਣੇ ਆਪ ਨਾਲ ਹੈ।
