ਕੁੱਲੂ ਦੇ ਹੋਟਲ ‘ਚ ਪੰਜਾਬਣ ਦੀ ‘ਨਸ਼ੇ ਦੀ ਓਵਰਡੋਜ਼’ ਨਾਲ ਮੌਤ, ਲਾਸ਼ ਹੋਟਲ ‘ਚ ਛੱਡ 2 ਸਾਥੀ ਹੋਏ ਫ਼

ਕੁੱਲੂ ਜ਼ਿਲ੍ਹੇ ਦੇ ਪਾਰਵਤੀ ਘਾਟੀ ਦੇ ਕਸੋਲ ਵਿੱਚ ਐਤਵਾਰ ਨੂੰ ਇੱਕ ਹੋਟਲ ਦੇ ਕਮਰੇ ਵਿੱਚ 23 ਸਾਲਾ ਕੁੜੀ ਦੀ ਰਹੱਸਮਈ ਹਾਲਾਤਾਂ ਵਿੱਚ ਮੌਤ ਤੋਂ ਬਾਅਦ ਪੰਜਾਬ ਦੇ ਦੋ ਨੌਜਵਾਨ ਫਰਾਰ ਹੋ ਗਏ ਹਨ।  ਪੁਲਿਸ ਨੇ ਦੱਸਿਆ ਕਿ 11 ਜਨਵਰੀ ਨੂੰ ਹਿਮਾਚਲ ਪ੍ਰਦੇਸ਼ ਦੇ ਕੁੱਲੂ ਦੇ ਇੱਕ ਹੋਟਲ ਵਿੱਚ 2 ਨੌਜਵਾਨਾਂ ਨਾਲ ਹੋਟਲ ਵਿੱਚ ਆਉਣ ਵਾਲੀ ਕੁੜੀ ਦੀ ਨਸ਼ੇ ਦੀ ਓਵਰਡੋਜ਼ ਦੇ ਸ਼ੱਕੀ ਮਾਮਲੇ ਵਿੱਚ ਮੌਤ ਹੋ ਗਈ।

ਜਾਂਚ ਟੀਮ ਦਾ ਹਿੱਸਾ ਰਹੇ ਇੱਕ ਪੁਲਿਸ ਅਧਿਕਾਰੀ ਨੇ ਦੱਸਿਆ ਕਿ ਮੁੱਖ ਦੋਸ਼ੀ ਆਕਾਸ਼ਦੀਪ ਸਿੰਘ (ਬਠਿੰਡਾ) ਨੇ 11 ਜਨਵਰੀ ਨੂੰ ਸਵੇਰੇ 6 ਵਜੇ ਦੇ ਕਰੀਬ ਕਸੋਲ ਦੇ ਇੱਕ ਹੋਟਲ ਵਿੱਚ ਚੈਕ ਇਨ ਕੀਤਾ। ਉਸ ਦੇ ਨਾਲ ਗੁਰਪ੍ਰੀਤ ਸਿੰਘ ਅਤੇ ਇੱਕ ਮਹਿਲਾ ਦੋਸਤ ਵੀ ਸੀ, ਜਿਸਦੀ ਬਾਅਦ ਵਿੱਚ ਪੁਲਿਸ ਨੇ ਪਛਾਣ ਪਰਵੀਨ ਕੌਰ ਵਜੋਂ ਕੀਤੀ, ਜੋ ਕਿ ਮੁਕਤਸਰ ਦੀ ਰਹਿਣ ਵਾਲੀ ਸੀ ਤੇ ਚੰਡੀਗੜ੍ਹ ਵਿੱਚ ਕੰਮ ਕਰਦੀ ਸੀ।

ਅੱਧੀ ਰਾਤ ਦੇ ਕਰੀਬ ਆਕਾਸ਼ਦੀਪ ਅਤੇ ਉਸਦੇ ਦੋਸਤ ਨੂੰ ਸਟਾਫ ਮੈਂਬਰਾਂ ਨੇ ਹੋਟਲ ਦੀ ਲਾਬੀ ਵਿੱਚੋਂ ਬੇਹੋਸ਼ ਪਰਵੀਨ ਕੌਰ ਨੂੰ ਬਾਹਰ ਲਿਜਾਂਦੇ ਦੇਖਿਆ। ਜਦੋਂ ਉਨ੍ਹਾਂ ਤੋਂ ਪੁੱਛਗਿੱਛ ਕੀਤੀ ਗਈ, ਤਾਂ ਉਨ੍ਹਾਂ ਦੋਵਾਂ ਨੇ ਜਵਾਬ ਦਿੱਤਾ ਕਿ ਪਰਵੀਨ ਸ਼ਰਾਬੀ ਹੋਣ ਕਾਰਨ ਡਿੱਗ ਪਈ ਤੇ ਉਹ ਉਸਨੂੰ ਹਸਪਤਾਲ ਲੈ ਜਾ ਰਹੇ ਸਨ।

ਪੁਲਿਸ ਅਧਿਕਾਰੀ ਨੇ ਕਿਹਾ ਕਿ ਪਰਵੀਨ ਦੇ ਮੂੰਹ ਅਤੇ ਨੱਕ ‘ਤੇ ਝੱਗ ਆ ਰਹੀ ਸੀ, ਤਾਂ ਸਟਾਫ ਨੇ ਉਨ੍ਹਾਂ ਦੀ ਮਦਦ ਕਰਨ ਦੀ ਪੇਸ਼ਕਸ਼ ਕੀਤੀ, ਪਰ ਦੋਵੇਂ ਉਸਨੂੰ ਹੋਟਲ ਦੇ ਗੇਟ ‘ਤੇ ਛੱਡ ਗਏ ਤੇ ਆਪਣੀ SUV ਵਿੱਚ ਭੱਜ ਗਏ। ਹੋਟਲ ਸਟਾਫ ਨੇ ਤੁਰੰਤ ਪੁਲਿਸ ਨੂੰ ਬੁਲਾਇਆ, ਜਿਸਨੇ ਉਸਨੂੰ ਜਰੀ ਪਿੰਡ ਦੇ ਨੇੜਲੇ ਸਰਕਾਰੀ ਹਸਪਤਾਲ ਵਿੱਚ ਲਿਜਾਇਆ ਜਿੱਥੇ ਡਾਕਟਰਾਂ ਨੇ ਉਸਨੂੰ “ਮ੍ਰਿਤਕ” ਘੋਸ਼ਿਤ ਕਰ ਦਿੱਤਾ।

ਪੁਲਿਸ ਨੇ ਆਕਾਸ਼ਦੀਪ ਤੇ ਉਸਦੇ ਦੋਸਤ ਗੁਰਪ੍ਰੀਤ ਸਿੰਘ ਦੇ ਖਿਲਾਫ ਬੀਐਨਐਸ ਦੀ ਧਾਰਾ 103 ਦੇ ਤਹਿਤ ਕਤਲ ਦਾ ਮਾਮਲਾ ਦਰਜ ਕੀਤਾ ਹੈ।